ރާއްޖޭގެ ސަރަހައްދުން ކަނޑުން ބައެއް ގެއްލުނު މައްސަލަ މިހާރު އޮތީ އިންޓަނޭޝަނަލް ލޯޔަރުންނާ ހަވަަލު ކުރުމުގެ މަރުހަލާގައި ކަމަށް ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެއެވެ.
ރާއްޖޭގެ ކަނޑުން ބައެއް ގެއްލުމުގައި އިހުމާލުވެފައިވާ ފަރާތްތަކުގެ މައްސަލަ ބައްލަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަހަރު އިއްވި ރިޔާސީ ބަޔާނުގައި ވިދާޅުވެފައެވެ. ރައީސް އޮފީހުގައި މިވަގުތު ކުރިއަށްދާ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ އެކަމާ ބެހޭ އަޕްޑޭޓަކީ ކޮބާތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން ބަންޑާރަނައިބު އުޝާމް ވިދާޅުވީ އެ މައްސަލަ ބެލުމަށްޓަކައި ރައީސް އޮފީހުން ވަނީ އެޓާނީ ޖެނެރަލްގެ އޮފީހާ ހަވާލުކުރައްވާފައި ކަމަށާއި އެ މަސައްކަތުގެ ދަށުން ރާއްޖޭގެ ތަޖުރިބާކާރުންނާއި ބޭރުގެ ތަޖުރިބާކާރުން އުފައްދާފައިވާ އެ މަސައްކަތުގެ ރިޕޯޓެއް ކެބިނެޓަށް ހުށަހަޅައި، ކެބިނެޓުގެ ރިކޮމޮންޑޭޝަން ރިޕޯޓެއް ތައްޔާރުކުރިކަމަށެވެ.
”އެ ރިކޮމޮންޑޭޝަނާ އެއްގޮތަށް ނިންމުންތަކެއް ވެސް އެބަހުރި. އެ މަސައްކަތް އިތުރަށް ކުރިއަށް ގެންދިޔުމަށްޓަކައި އިންޓަނޭޝަނަލް ބައެއް ލޯޔާސް އަދި ތަޖުރިބާކާރުންނާ އެ މަސައްކަތް ހަވާލުކުރުމުގެ މަރުހަލާގައި މިހާރު މިތިބީ“ އުޝާމް ވިދާޅުވިއެވެ.
ބަންޑާރަނައިބު އިތުރަށް ވިދާޅުވީ، އެ އިދާރާގެ ޓީމެއް މިވަގުތުވެސް އެ މަސައްކަތް ކުރަމުންދާ ކަމަށާއި އެ މަސައްކަތް ކުރިއަށްދާނެ ގޮތާބެހޭގޮތުން އިތުރު ތަފްސީލީ މައުލޫމާތު ކުރިއަށް އޮތް ދެ ހަފްތާއެއްހާ ދުވަސް ތެރޭގައި ހާމަކުރެވޭނެކަމަށް ޤަބޫލުކުރައްވާ ކަމަށެވެ.
ރާއްޖޭގެ ކަނޑުން ބައެއް ގެއްލުމާ ގުޅޭގޮތަށް، ކުރީގެ ރައީސް އިބްރާހިމް މުޙައްމަދު ޞާލިޙް މޮރިޝަސްއަށް ފޮނުއްވި ސިޓީ އަނބުރާ ގެންނަވަން ނިންމެވި ކަމަށް ރައީސް މުޢިއްޒުވަނީ މިއަހަރުގެ ރިޔާސީ ބަޔާން އިއްވަވައިދެއްވި ދުވަހު ހާމަކުރައްވާފައެވެ.
އެގޮތުން ރައީސް ވިދާޅުވީ، ރާއްޖޭގެ ހާއްސަ އިގްތިސޯދީ ސަރަހައްދަކީ ދޫކޮށްލި ކަނޑުގެ ސަރަހައްދު ހިމެނޭ ގޮތަށް ނިންމައި އެކަން އިއުލާނު ކުރައްވާ ކަމަށެވެ.
ރައީސްގެ ރިޔާސީ ބަޔާނުގައި އެމަނިކުފާނު ވަނީ، ރާއްޖެއާ ދެކޮޅަށް މޮރިޝަސްއިން ހުށަހެޅި މައްސަލައިގައި، ނިމިދިޔަ ސަރުކާރުން އަމަލުކޮށްފައިވާ ގޮތުން ރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބޮޑު ބައެއް ގެއްލޭ ގޮތަށް އިޓްލޮސްއިން ނިންމާފައިވާ ނިންމުން ބަދަލު ކުރައްވަން، ކުރައްވަމުން ގެންދަވާ މަސައްކަތްތަކުގެ ތަފްސީލު ދެއްވައިފައެވެ.
އެގޮތުން ރައީސް ވިދާޅުވީ ޗާގޯސް ނުވަތަ ފޯޅަވަހީގެ ތާރީޚެއް ރާއްޖެއަށް އޮތް ކަމަށާއި، އެއީ އޭރުވެސް މިހާރު ވެސް ދިވެހީން މަހަށް ނުކުމެ ތިބޭ ސަރަހައްދެއް ކަމަށެވެ. ފޯޅަވަހި މޮރިޝަސްއަށް ދިނުމާ ދެކޮޅަށް، ރާއްޖޭން 18 ޖަނަވަރީ 2026ގައި އިނގިރޭސިވިލާތަށް އިއުތިރާޒު ހުށަހަޅައިފައިވާނެ ކަމަށް ވެސް ރައީސް ވިދާޅުވިއެވެ.
”އިޓްލޮސްއިން މައްސަލަ ނިންމާފައިވަނީ ރާއްޖޭގެ ކަނޑުގެ ސަރަހައްދުން ބައެއް ގެއްލޭ ގޮތަށް. އެއީ މިދިޔަ ސަރުކާރުން ދޫކޮށްލި ސަރަހައްދެއް. އެ ކަނޑުގެ ސަރަހައްދު ހޯދަން ގާނޫނީ ގޮތުން މަސައްކަތް ކުރަން ބަންޑާރަ ނައިބަށް ވާނީ އަންގައިފަ. އެ މައްސަލަ ދިރާސާ ކުރި ކޮމިޓީގެ ރިޕޯޓު މިދިޔަ މަހު 22ގައި އަޅުގަނޑަށް ވަނީ ހުށަހަޅުއްވާފަ. އަދި ކެބިނެޓުން މިހާރު ވަނީ އެ ރިޕޯޓާ ގުޅިގެން ފިޔަވަޅު އަޅަން ފަށައިފަ“ ރައީސް މުޢިއްޒު ވިދާޅުވިއެވެ.
މީގެއިތުރުން ކުރީ ސަރުކާރުގެ ނިންމުންތަކުގެ ސަބަބުން އިޔާދަ ނުކުރެވޭ ގެއްލުން ލިބިފައިވާތީ، އެކަމާ ގުޅޭ ގޮތުން ސުވާލުކޮށް، ގާނޫނީ ފިޔަވަޅު އަޅަން ކޮމިޝަން އޮފް އިންކުޔަރީއެއް ހަދަން ނިންމައިފައިވާކަން ވެސް ރައީސް އިއުލާންކުރެއްވެވިއެވެ.