ދިވެހިރާއްޖޭގެ އުތުރާއި ދެކުނުގައި ފްރީ ޒޯންތަކެއް ޤާއިމްކުރުމަށް ސަރުކާރުން ކުރަމުންދާ މަސައްކަތުގެ ދަށުން، އައްޑޫ ސިޓީގައި ޤާއިމްކޮށްފައިވާ ”އައްޑޫ ރީޖަނަލް ފްރީ ޒޯން“ މިއަދު ރަސްމީކޮށް އިފްތިތާހްކޮށްފިއެވެ.
އައްޑޫ ހައި ސްކޫލްގައި މިއަދު ހަވީރު އޮތް ރަސްމިއްޔާތެއްގައި ”އައްޑޫ ރީޖަނަލް ފްރީ ޒޯން“ ރަސްމީކޮށް އިފްތިތާހްކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސައީދާއި މިނިސްޓްރާ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ، ޢަލީ އިޙްސާނެވެ.
”އައްޑޫ ރީޖަނަލް ފްރީ ޒޯން“ އިފްތިތާހްކުރުމާއެކު، ގައި މުދާ ރައްކާކުރުމާއި ފްރީ ޒޯންއާއި ގުޅުންހުރި މަސައްކަތްތައް ކުރުމަށް ޝައުގުވެރިވާ ވިޔަފާރިތަކަށް އެ ސަރަހައްދުން ޖާގަ ހޯދުމަށް ”އެކްސްޕްރެޝަން އޮފް އިންޓަރެސްޓް“ (އީ.އޯ.އައި) ހުށަހެޅުމަށް 13 މެއި 2026 ވަނަ ދުވަހުން ފެށިގެން ވަނީ ހުޅުވާލެވިފައެވެ.
އެމް.ޕީ.އެލްއިން ވަނީ 13 މެއި 2026 ވަނަ ދުވަހުން ފެށިގެން 11 ޖޫން 2026ގެ ނިޔަލަށް ”އައްޑޫ ރީޖަނަލް ފްރީ ޒޯން“ މުދާ ރައްކާކުރުމާއި ފްރީ ޒޯންއާ ގުޅުންހުރި މަސައްކަތްތައް ކުރުމަށް ޝައުގުވެރިވާ ވިޔަފާރިތަކަށް ”އެކްސްޕްރެޝަން އޮފް އިންޓަރެސްޓް“ ހުށަހެޅުމަށް ހުޅުވާލާފައެވެ.
އަދި ”އެކްސްޕްރެޝަން އޮފް އިންޓަރެސްޓް“ ހުށަހަޅާ މުއްދަތު ހަމަވުުމުން، ޝައުގުވެރިވާ ވިޔަފާރިތަކަށް ކުރަން ބޭނުންވާ މަސައްކަތާއި ގުޅޭ ތަފްސީލާއި، ބޭނުންވާ ބިމުގެ ބޮޑުމިނާއި ބިމުގެ ލީސް އެއްބަސްވުމާއި ގުޅޭ ތަފްސީލުތައް ހިމެނޭ ގޮތަށް ޕްރޮޕޯސަލްތައް ހުށަހެޅުމަށް ފުރުސަތު ލިބިގެންދާނެއެވެ. ”އައްޑޫ ރީޖަނަލް ފްރީ ޒޯން“ ސަރަހައްދުން ބިން ލިބޭ ވިޔަފާރިތައް ކަނޑައަޅާނީ ހުށަހަޅާ ޕްރޮޕޯސަލްތައް އިވެލުއޭޓްކުރުމަށް ފަހުއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރ ސައީދު ވިދާޅުވީ ސަރުކާރުގެ އަމާޒަކީ ފްރީ ޒޯންގެ ޚިދުމަތާއެކު، ބައިނަލްއަޤްވާމީ ފެންވަރުގެ ސަރަހައްދީ ވިޔަފާރި ހަބަކަށް އަައްޑޫ ސިޓީ ތަރައްޤީކުރުން ކަމަށެވެ.
”މިކަމުގެ ސަަބަބުުން ދެކުނުގައި ގިނަ އަދަދެއްގެ ވަޒީފާގެ ފުރުސަތު އުފެދޭނެ. އަދި އަމިއްލަ ވިޔަފާރިވެރިންނަށް އައު އިންވެސްޓްމަންޓްތަކަށް މަގު ހުޅުވުމުގެ އިތުރުން، ރާއްޖެއަށް ވަންނަ ބޭރު ފައިސާގެ މިންވަރު އިތުރުވެ، ބޭރުގެ އިންވެސްޓަރުންގެ އިތުބާރު ބޮޑުވުމާއި، މާލޭ ސަރަހައްދަށް ބަރޯސާވުން ކުޑަވެ، ސަރަހައްދީ ތަރައްޤީއަށް ބޮޑު ކުރިއެރުމެއް ލިބޭނެ،“ މިނިސްޓަރ ވިދާޅުވިއެވެ.
”އައްޑޫ ރީޖަނަލް ފްރީ ޒޯން“ގެ ޚިދުމަތަށް ކަނޑައަޅާފައިވާ ސަރަހައްދުގެ ތެރެއިން، 20،000 އަކަ ފުޓޫގެ ބިމެއްގެ އިން ވަކިކޮށް، ފެންސް ޖެހުމުގެ މަސައްކަތް މިހާރު ދަނީ ކުރިއަށެވެ.
މި ރަސްމިއްޔާތުގައި ވާހަކަދައްކަވަމުން އެމް.ޕީ.އެލްގެ ޑެޕިއުޓީ މެނޭޖިން ޑިރެކްޓަރ މުޙައްމަދު ލައްމާން ވިދާޅުވީ އައްޑޫ ފްރީ ޒޯނަކީ އައްޑޫ ސިޓީ އާއި މުޅި ރާއްޖޭގެ ރައްޔިތުންވެސް ފަހުރުވެރިވާނެ މަސައްކަތަކަށް ހެދުމަށް އުންމީދުކުރައްވާ ކަމަށެވެ.
”މިއީ (އައްޑޫ ރީޖަނަލް ފްރީ ޓްރޭޑް ޒޯނަކީ) ހަމައެކަނި ޖެހިގެންދާ ނަންބޯޑެއް ނޫން. މިއީ އެކަމަށްޓަކައި އައްޑޫސިޓީގެ ހިތަދޫ ޕޯޓަށް އިހުތިސާސްކުރެވިގެން 1.7 ހެކްޓަރުގެ ބިމެއް އެކަށައެކީ، މި ޚިދުމަތަށް ބޭނުންވާ 20.000 އަކަފުޓޫގެ ސަރަހައްދުގައި އިންވަކިކޮށް، ފެންސުޖެހި، ރޭވުންތެރިމާއި، ދުރުވިސްނުމުގެ ތެރެއިން އަޅުގަނޑުމެން ފަށާ، ރާއްޖޭގެ އިޤްތިޞާދީ އަދި އުމްރާނީ ތަރައްޤީގެ އަޖާއިބަކަށް ވެގެންދާނެ.“ ލައްމާން ވިދާޅުވިއެވެ.
ލައްމާން އިތުރަށް ވިދާޅުވީ، މި މަސައްކަތަކީ އައްޑޫ ސިޓީއާއި މުޅި ރާއްޖޭގެ ރައްޔިތުން ފަޚުރުވެރިވާނެ މަސައްކަތެއް ކަމަށެވެ.