ބައިނަލްއަޤްވާމީ ކަނޑުގެ ސަރަޙައްދުން ދަތުރުކުރަމުން ދިޔަ އީރާނުގެ ތެޔޮ ޓޭންކަރެއް އެމެރިކާގެ އަސްކަރިއްޔާއިން އަތުލައިގެންފިއެވެ.
މިއީ އީރާނުގެ ތެޔޮ އެކްސްޕޯޓު ކުރުމުގެ ދާއިރާއާ ދެކޮޅަށް އެމެރިކާއިން އަޅާފައިވާ މިފަދަ ފުރަތަމަ ފިޔަވަޅު ކަމަށް ރިޕޯޓުތައް ބުނެއެވެ.
އީރާނުގެ ޓޭންކަރު އަތުލައިގެންފައިވާ ކަން އެމެރިކާގެ އަސްކަރިއްޔާއިން އިޢުލާނުކުރުމާ ގުޅިގެން، ރައީސް ޑޮނަލްޑް ޓްރަމްޕް ވަނީ ދެ ޤައުމުގެ ދެމެދުގައި އޮތް ޙަމަލާ ބަދަލުކުރުން ހުއްޓާލުމުގެ އެއްބަސްވުމުގެ މުއްދަތު އިތުރުކުރަން ބޭނުންފުޅުނުވާ ކަމަށް ވިދާޅުވެފައެވެ.
ޓްރަމްޕް އިތުރަށް ވިދާޅުވީ ޞުލްޙައިގެ މަޝްވަރާތައް ކާމިޔާބު ނުވާނަމަ، އަލުން ޙަމަލާތައް ދޭން ފެށުމަށް އެމެރިކާގެ އަސްކަރިއްޔާ އޮތީ ތައްޔާރަށް ކަމަށެވެ.
އީރާނުގެ އުޅަނދުފަހަރު ދަތުރުފަތުރު ކުރުމަށް އެމެރިކާއިން ހުރަސްއަޅަމުންދާތީ، އިތުރު މަޝްވަރާތަކުގައި ބައިވެރިނުވާނެ ކަމަށް އީރާނުން މީގެ ކުރިން ބުނެފައިވެއެވެ. ނަމަވެސް އެމެރިކާއިން އުންމީދު ކުރަނީ ޙަމަލާ ބަދަލުކުރުން ހުއްޓާލާފައިވާ މުއްދަތު ހަމަވުމުގެ ކުރިން ޕާކިސްތާނުގައި ޞުލްޙައިގެ މަޝްވަރާތައް ކުރިއަށް ގެންދެވޭނެ ކަމަށެވެ.
މިކަމާ ގުޅިގެން އީރާނު ސަރުކާރުގެ ތަރުޖަމާނު ފާޠިމާ މުހާޖެރާނީ ވިދާޅުވީ، އީރާނުން އަލުން ހަނގުރާމައެއް ބޭނުންނުވާ ކަމަށެވެ. އެހެންނަމަވެސް، ޙަމަލާއެއް ދީފިނަމަ، އިހުނަށްވުރެ ވަރުގަދައަށް އެ ޙަމަލާތަކުގެ ރައްދު އީރާނުން ދޭނެ ކަމަށް ފާޠިމާ މުހާޖެރާނީ ވަނީ އިންޒާރު ދެއްވާފައެވެ.