ކޯޓުގެ ހުރުމަތް ކެނޑިކަމުގެ ތުހުމަތުގައި ކްރިމިނަލް ކޯޓުން އިއްވި ޖަލު ހުކުމް ތަންފީޒުކޮށް ނިމުމުން، ”އަދަދު“ ނޫހުގެ ނޫސްވެރިޔާ މުހައްމަދު ޝަހުޒާން މިއަދު މިނިވަންވެއްޖެއެވެ.
ޝަހުޒާންގެ އިތުރުން އެ ނޫހުގެ ނޫސްވެރިޔާ ލީވާން އަލީ ނާސިރު ވެސް ވަނީ މީގެ ފަސް ދުވަސް ކުރިން، ހުކުމް ތަންފީޒުކޮށް ނިމުމުން މިނިވަންވެފައެވެ. ކްރިމިނަލް ކޯޓުން ޝަހުޒާން ޖަލަށްލުމަށް ހުކުމްކުރީ 15 ދުވަހަށެވެ. އަދި ލީވާން ޖަލަށްލުމަށް ހުކުމްކުރީ 10 ދުވަހުގެ މުއްދަތަށެވެ.
މި ދެ ނޫސްވެރިން ޖަލަށްލުމަށް ކްރިމިނަލް ކޯޓުން ނިންމީ، ގަޒުފުކުރިކަމުގެ ތުހުމަތުގައި ’އަދަދު‘ ނޫހުގެ އިސްވެރިންގެ މައްޗަށް އުފުލާފައިވާ ދައުވާތަކާ ގުޅިގެން ނެރުނު އަމުރަކާ ޚިލާފުވި ކަމަށް ބުނާ މައްސަލައިގައެވެ. މި މައްސަލައިގެ ޝަރީއަތް ކުރިއަށް ގެންގޮސްފައިވަނީ ސިއްރުންނެވެ.
މި މައްސަލައާ ގުޅިގެން އެ ނޫހުގެ ސީއީއޯ ހުސައިން ފިޔާޒު މޫސާ މީގެ ކުރިން ވިދާޅުވެފައިވަނީ، ދެ ނޫސްވެރިން ޖަލަށްލީ ތުހުމަތުތަކުން ދިފާއުވުމަށް އެއްވެސް ފުރުސަތެއް ނުދީ ކަމަށެވެ. މި ހުކުމްތައް ހައިކޯޓުގައި އިސްތިއުނާފު ކުރުމުން، އެ ކޯޓުން މިހާރު ވަނީ މި މައްސަލަ ބަލައިގެންފައެވެ. ނަމަވެސް، މައްސަލައިގެ އަޑުއެހުންތައް ފަށާނެ ތާރީޚެއް ހައިކޯޓުން އަދި ހާމަކޮށްފައެއް ނުވެއެވެ.
ދެ ނޫސްވެރިން ޖަލަށްލީ މައްސަލައިގައި ބައިނަލްއަގުވާމީ ޖަމިއްޔާތަކުން ވަނީ ބޮޑެތި ކަންބޮޑުވުންތަކެއް ފާޅުކޮށްފައެވެ. އެގޮތުން އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އާއި ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވަނީ މި ނިންމުން ކުށްވެރިކޮށް، ނޫސްވެރިން ވަގުތުން ދޫކޮށްލުމަށް ގޮވާލާފައެވެ.
މީގެ އިތުރުން، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ވެސް ވަނީ މި މައްސަލަ ތަހުގީގު ކުރަން ފަށާފައެވެ. އެ ކޮމިޝަނުން ވަނީ ޖަލުގައި ތިބި ނޫސްވެރިންނާ ބައްދަލުކޮށް، އެ މީހުންގެ ހާލަތު ބަލައި، ކަންކަން ހިނގައިދިޔަ ގޮތް އޮޅުންފިލުވާފައެވެ.
މި ދެ ނޫސްވެރިން ވެސް މިހާރު މިނިވަންވެފައި މިވަނީ، ކޯޓުން އިއްވި ޖަލު ހުކުމުގެ މުއްދަތު އެއްކޮށް ތަންފީޒުކޮށް ނިމުމުންނެވެ.