އިނގިރޭސިވިލާތުގެ ބޮޑުވަޒީރު ކޭއާ ސްޓާމަރ މަޤާމުން އިސްތިއުފާ ދެއްވައިފިއެވެ.
ޓީވީ މެދުވެރިކޮށް ދެއްވި ބަޔާނެއްގައި ސްޓާމަރ އިސްތިއުފާ ދެއްވީ އޭނާ ނިސްބަތްވާ ލޭބަރ ޕާޓީގެ އެތެރޭގެ ޕްރެޝަރު ބޮޑުވުމާ ގުޅިގެންނެވެ.
އެއީ ނޯތު ވެސްޓް އިނގިރޭސިވިލާތުގެ ޕާލަމެންޓްރީ ގޮނޑިއެއް ހޯދުމަށް އޭނާގެ ވާދަވެރިޔާ އެންޑީ ބާންހަމް ބައި އިލެކްޝަންގައި ނިންމާލަދޭ ކާމިޔާބީއާ ގުޅިގެންނެވެ. ބޮޑުވަޒީރުގެ ރަސްމީ ގެކޮޅުގައި މިއަދު ހެނދުނު ދެއްވި ޚިޠާބެއްގައި ވިދާޅުވީ، އިސްތިއުފާ ދެއްވުމުގެ ކުރިން ޗެކަރސްގައި އާއިލާއާއެކު ހަފްތާ ބަންދު ހޭދަކުރައްވައި، އޭނާގެ ސިޔާސީ މުސްތަގުބަލާ ބެހޭ ގޮތުން މަޝްވަރާ ކުރައްވާފައިވާ ކަމަށެވެ.
2024 ވަނަ އަހަރުގެ އާންމު އިންތިހާބުގައި ބޮޑު އަޣުލަބިއްޔަތަކުން ކާމިޔާބު ހޯއްދެވިތާ ދެ އަހަރު ފަހުން ސްޓާމަރ މަގާމުން ވަކިވެވަޑައިގަންނަވާއިރު، މިއީ އިނގިރޭސި ސިޔާސީ މަސްރަހަށް އައި ބޮޑު ބަދަލެކެވެ.
ޚަބަރުތައް ލިބޭގޮތުގައި ސްޓާމަރ މަގާމުން ވަކިވުމަށް އެންމެ ބޮޑަށް ބާރުއެޅުއްވި އެއް ވަޒީރަކީ ފޮރިން ސެކްރެޓަރީ ޔުވެޓް ކޫޕަރ އެވެ. މީގެ އިތުރުން، އެޑިއުކޭޝަން މިނިސްޓަރު ބެރޮނެސް ޖެކީ ސްމިތު މިއަދު ހެނދުނު ވިދާޅުވީ ބާންހަމްގެ ވެރިކަމެއްގައި ޚިދުމަތް ކުރައްވަން ތައްޔާރަށް ހުންނެވި ކަމަށެވެ.
ނަމަވެސް، ލޭބަރ ސަރުކާރުތަކުގެ ލީޑަރުންނާ މެދު ޕާޓީން އަމަލުކުރާ ގޮތާ މެދު ސަމާލުވުމަށް އޭނާ ވަނީ އިލްތިމާސް ކުރައްވާފައެވެ.