ފުޓްބޯޅައިގެ ފޯރީގައި އުފާ ފާޅުކުރާއިރު އެހެން މީހުންގެ ޙައްޤުތަކަށް އިޚުތިރާމް ކުރުމަށާއި، މުޖުތަމައުގެ އަމާންކަން ގެއްލިދާނެ ފަދަ އެއްވެސް ކަމެއް ނުކުރުމަށް ފުލުހުން ޚިދުމަތުން އިލްތިމާސްކޮށްފިއެވެ.
ފުލުހުން މިކަމަށް އިލްތިމާސްކޮށްފައިވަނީ މިރޭ ކުޅުމަށް ހަމަޖެހިފައިވާ އާޖެންޓީނާއާއި އިންގްލެންޑް ބައްދަލުކުރާ ފޯރިގަދަ މެޗަށް ސަޕޯޓަރުން ތައްޔާރުވަމުންދާ ދަނޑިވަޅެއްގައެވެ.
ފުލުހުން ވިދާޅުވީ، ދަންވަރުގެ ވަގުތުތަކަކީ ގިނަ ރައްޔިތުން އަރާމުކުރާ ވަގުތުތަކަކަށް ވުމާއެކު، އާންމު މަގުތަކާއި މީހުން ދިރިއުޅޭ ސަރަހައްދުތަކުގައި އަޑުގަދަ ކުރުމާއި، ބާރަށް ލަވަ ޖެހުމާއި، އުޅަނދުފަހަރުގެ ބަރުގޮނު އެޅުން ފަދަ އެހެން މީހުންނަށް އުނދަގޫވާނެ ކަންކަމުން ދުރުހެލިވުމަށް ހަނދާންކޮށްދޭ ކަމަށެވެ.
މީގެ އިތުރުން، އާންމު ސަރަހައްދުތަކުގައި ބަހައްޓާފައިވާ ސްކްރީންތަކުން މެޗު ބަލާއިރު، މަގު ބޭނުންކުރާ އެހެނިހެން ފަރާތްތަކަށް ދަތިވާނެހެން ސައިކަލުތައް މަޑުކޮށްގެން ނުތިބުމަށް ފުލުހުން ވަނީ އިރުޝާދު ދެއްވާފައެވެ. އަދި މެޗު ނިމުމަށްފަހު ބައިބަޔަށް އެއްވުމާއި، ސައިކަލު ބުރު ޖެހުން ފަދަ ކަންކަން ނުކުރުމަށްވެސް ވަނީ އިލްތިމާސްކުރައްވާފައެވެ.
މިފަދަ ހަރަކާތްތަކުގެ ސަބަބުން އަވަށްޓެރިންނަށް އުނދަގޫވެ، މަގު ބޭނުންކުރާ މީހުންނަށް ބޮޑެތި ދަތިތަކާ ކުރިމަތިވެދާނެކަން ފުލުހުން ފާހަގަކުރެއެވެ.
ފުލުހުންގެ އިލްތިމާސްގައި އިތުރަށް ބުނެފައިވަނީ، މެޗުގެ ފޯރީގައި ބައިވެރިވާއިރު، ކުޑަކުދިންނާއި، އުމުރުން ދުވަސްވީ މީހުންނާއި، އަވަށްޓެރިންގެ ޙައްޤުތަކަށް އިސްކަންދިނުމަކީ މުހިންމު ކަމެއް ކަމަށެވެ. އެހެންކަމުން، ކުޅިވަރުގެ ރޫހާ އެއްގޮތަށް، އެހެން މީހުންނަށް އުނދަގޫ ނުވާނެހެން އުފާފާޅުކުރުމަށް ފުލުހުން ވަނީ ނަސޭހަތްތެރިވެފައެވެ.