ނޭޕާލްގެ ހިމާލަޔާ ސަރަހައްދުގައި ހިނގި ފެންބޮޑުވުމުގެ ނުރައްކާތެރި ހާދިސާގައި މިހާތަނަށް މަރުވި މީހުންގެ އަދަދު 469 އަށް އަރައިފިއެވެ.
މި މަހުގެ 26 ވަނަ ދުވަހުގެ ހެނދުނު މި ހާދިސާ ހިނގަން މެދުވެރިވީ ހިމާލަޔާ ސަރަހައްދުގެ އުސް ފަރުބަދައަކުން ބިޔަ ގަނޑުފެން ފަށަލައެއް (ގްލޭޝިއަރެއް) ކަނޑައިގެން ގޮސް، ކިސަޑާއި ގަލާއި އައިސް އެކުވެގެން އުފެދުނު ބޮޑު އޮއިވަރެއް ބޮޓޭކޯޝީ އަދި ތްރިޝޫލީ ކޯރުގެ އައްސޭރީގައިވާ އަވަށްތަކަށް ފައިބައިގަތުމުގެ ސަބަބުންނެވެ.
ކަތަމަންޑޫ ޕޯސްޓުން އާންމުކޮށްފައިވާ އެންމެ ފަހުގެ މައުލޫމާތުތަކަށް ބަލާއިރު، މި ކާރިސާގައި 469 މީހަކު މަރުވެފައިވާއިރު، އެތައް ސަތޭކަ ބަޔަކު އަދިވެސް ވަނީ ގެއްލިފައެވެ. ގެއްލިގެން ހޯދަމުންދާ މީހުންގެ ތެރޭގައި 127 ނޭޕާލް މީހުންނާއި، ދުނިޔޭގެ 30 ގައުމަކަށް ނިސްބަތްވާ 667 ފަތުރުވެރިން ހިމެނޭ ކަމަށް އެ ގައުމުގެ މީޑިއާތަކުން ރިޕޯޓްކުރެއެވެ.
ޓިބެޓާއި ނޭޕާލް ގުޅޭ އިމިގްރޭޝަން ޗެކްޕޮއިންޓް ކައިރީގައި އޮންނަ ސުޔާޕްރޫ ބޭޝީ އަވަށުގެ ގިނަ އަދަދެއްގެ ޢިމާރާތްތަކެއް ވަނީ، ސުނާމީއެއް ފަދައިން އައި ބާރުގަދަ ކިސަޑު ފެންގަނޑާއެކު މުޅިން ހަލާކުވެ ދަމައިގަނެގެން ގޮސްފައެވެ. މީގެ އިތުރުން، މި ހާދިސާގެ ސަބަބުން އެ ސަރަހައްދުގެ 19 ފާލަމަކާއި، މައި މަގުތަކުގެ އިތުރުން ފެނުން ކަރަންޓު އުފައްދާ ހައިޑްރޯޕަވަރ ޕްލާންޓްތަކަށް ވަނީ ބޮޑެތި ގެއްލުންތަކެއް ލިބި، މުއާޞަލާތީ ޚިދުމަތްތައްވެސް ވަނީ މުޅިންހެން މެދުކެނޑިފައެވެ.
ސައިންސްވެރިންނާއި ކަމާބެހޭ މާހިރުން ހާމަކުރާ ގޮތުގައި، މި ހާދިސާ ހިނގާފައިވަނީ ކުރިން ލަފާކުރެވުނު ފަދައިން ބިންހެލުމެއްގެ ސަބަބުންނެއް ނޫނެވެ.
އޭގެ ބަދަލުގައި، އުސް ފަރުބަދައަކުން ވެއްޓުނު ބިޔަ އައިސްގަނޑު ތިރިއަށް ވެއްޓުމުގައި އުފެދުނު ގަދަފަދަ ބާރާއި ކޭއްތުމުގެ ސަބަބުން ވަގުތުން ފެނަށް ބަދަލުވެ، ވިއްސާރައިގެ ސަބަބުން ފުރިފައިވާ ކޯރުތަކަށް އެއްފަހަރާ ބަންޑުންވުމުންނެވެ.