ނޭޕާލާއި ޗައިނާ ގުޅޭ ބޯޑަރު ސަރަހައްދުގައި ހިނގި ފެންބޮޑުވުމުގެ ނުރައްކާތެރި ހާދިސާގައި މިހާތަނަށް މަރުވި މީހުންގެ ޖުމްލަ އަދަދު 734 އަށް އަރައިފި ކަމަށް އެ ގައުމުގެ ކަމާބެހޭ އިދާރާތަކުން ހާމަކޮށްފިއެވެ.
މި ހާދިސާގައި ގެއްލިގެން ހޯދަމުންދާ މީހުންގެ އަދަދު މިހާރު ވަނީ 2،498 އަށް އަރާފައެވެ.
މި މަހުގެ 26 ވަނަ ދުވަހުގެ ހެނދުނު މި ހާދިސާ ހިނގާފައިވަނީ، ބޯޑަރު ސަރަހައްދުގެ އުސް ފަރުބަދަތަކުގެ ބައިތަކާއި ގަނޑުފެންތަކުގެ ބޮޑު ބައެއް ވެއްޓި ލެންޑޭ ކޯލާ ކޯރަށް އެޅުމާ ގުޅިގެންނެވެ. އެ ތަކެތި އެޅި ކޯރު ވަގުތީ ގޮތުން ބަންދުވެފައި އޮތުމަށްފަހު، ގަނޑުފެންތައް ވިރިގެން އުފެދުނު ބޮޑު ފެންގަނޑު ފަޅައިގެން ގޮސް ފެންބޮޑުވީއެވެ.
ގެއްލިގެން ހޯދަމުންދާ މީހުންގެ ތެރޭގައި ހައިޑްރޯޕަވާ ޕްރޮޖެކްޓުގައި މަސައްކަތްކުރަމުންދިޔަ 933 މީހުންނާއި، އެހެން ގައުމުތަކަށް ނިސްބަތްވާ 589 މީހުންގެ އިތުރުން އެ މީހުންނާއެކު ދަތުރުކުރި ނޭޕާލުގެ 127 ފަތުރުވެރިން ހިމެނެއެވެ.
ގެއްލުނު ފަރާތްތައް ހޯދުމުގެ މަސައްކަތުގައި 20،000 އަށް ވުރެ ގިނަ މީހުން ހަރަކާތްތެރިވަމުން އަންނައިރު، މިހާތަނަށް ވަނީ 8،186 މީހުން ރައްކާތެރިކަމާއެކު ސަލާމަތްކޮށްފައެވެ.
އަދި މި ބޮޑު ކާރިސާއިން އަރައިގަތުމަށްޓަކައި 11 ގައުމަކުން މިހާރު ދަނީ ނޭޕާލަށް އެހީތެރިކަން ފޯރުކޮށްދެމުންނެވެ.